Biðlar til fólks að dvelja ekki í Grindavík
Það er óbreytt mat Úlfars Lúðvíkssonar, lögreglustjóra á Suðurnesjum, að ógn geti stafað af hraunrennsli og gasmengun í Grindavík og inn í Svartsengi við núverandi aðstæður. Hætta er talin á að loftmengun geti ógnað heilsu manna inn á merktu hættusvæði en áfram er aukin hætta vegna gasmengunar, segir í tilkynningu frá lögreglustjóranum
Þá segir að við breytilega vindátt getur vart talist forsvaranlegt að halda úti starfsemi í Bláa Lóninu á meðan eldgos er enn í gangi og á það jafnframt við um aðra starfsemi inn á merktu hættusvæði. Fylgst er vel með loftgæðum á svæðinu m.a. í góðu samstarfi við atvinnurekendur.
Há gildi af SO2 (brennisteinsdíoxíð) hafa mælst á svæðinu undanfarið. Þessi mengun er talin mjög óholl og líklegt að flestir gætu fundið fyrir einkennum í öndunarfærum. Mikilvægt er að dvelja innandyra, loka gluggum og slökkva á loftræstingu. Þetta á ekki síst við þar sem vinna fer fram utandyra. Þá þurfa fyrirtæki og stofnanir á suðvesturhorni landsins að huga vel að þróun loftgæða vegna mögulegrar hættu á gasmengun.
Úlfar ögreglustjóri biðlar til íbúa Grindavíkur svo og annarra sem eiga hagsmuna að gæta inn á merktu hættusvæði að dvelja þar ekki. Þar geta skapast aðstæður sem geta verið lífshættulegar mönnum.
Þeir sem eiga erindi inn í Grindavík er bent á að athuga reglulega með loftgæði á svæðinu inn á vefsíðu Umhverfisstofnunar, á slóðinni: https://loftgaedi.is/
Bent er á gagnlegar upplýsingar á vefsíðu Landlæknisembættisins, á slóðinni: https://island.is/eldgos-heilsa og vefsíðu Vinnueftirlitsins, á slóðinni: https://vinnueftirlitid.is/
